الإبداع القرآني في سورة يوسف

قلم: أ.د. عمرو حسن الحسني أستاذ المخ و الأعصاب جامعة القاهرة

#بوست_الجمعه النهارده عن ١٠ دروس( ربما تسمعها لأول مرة) تعلمتها من سورة يوسف

السورة اللي كلنا بنحبها و طالما استمتعنا بسماعها و قرائتها ..لأنها ببساطة حسب ترشيحات القرآن ..هي أحسن القصص 😍

١- التسامح :

و أول ما هقول التسامح هيجيي في ذهننا قول يوسف لاخوته "لا تثريب عليكم اليوم يغفر الله لكم"

و قول ابيه لهم " سوف أستغفر لكم ربي "

و لكن الحقيقه المشهدين دول بالنسبه لي سهل تفهمهما نفسيا

مش صعب ان واحد بقي وزير و آتاه الله الملك و الحكم أن يسامح من ظلموه من عشرات السنين و خاصه انهم ان كانوا بفعلتهم احد أسباب ما تهيأ له من ملك و حكمه . أو إن أب رجع له بصره و ابنه الضائع في لحظة واحده إنه يسامح

المشهد اللي الحقيقه صعب علي حد يعمله و هو التسامح الأبرز من وجهه نظري

هو اسداء النصيحه الصادقه و المخلصه للملك في تفسير رؤياه

تخيل واحد ساجنك سنين ظلم و جايلك واحد من طرفه بيقولك فسرلي الرؤيا المتعلقه باقتصاد البلد 😳😳

سيدنا يوسف مفكرش و لا ساوم و لا صب جام غضبه علي رسول الملك

اعطي النصيحه الصادقه لمن ظلمه في هدوء و دون من أو أذي😍

٢- الملافظ سعد: 🤐🤐

نقي كلامك و فلتره كويس قبل ما تنطقه ..خليك شيك و مؤدب

السورة اتكلمت عن "إمرأة العزيز" مرارا و لما جه الكلام عن واقعة التحرش تحرج القرآن ذكرها صراحة و قال "و راودته التي هو في بيتها" ..كذلك سيدنا يوسف لما قال عن أخيه "معاذ الله أن نأخذ إلا من وجدنا متاعنا عنده" و لم يقل من سرق لأنه عارف إنه مسرقش

٣- الأدب مع الله:

فو الله لا أجد من هو أكثر أدبا مع الابتلاء من سيدنا يوسف

اللي ماطلعش منه العيبة رغم كل الابتلاءات

في آيه هي أجمل آيات الأدب مع أقدار الله

" و قد أحسن بي إذ أخرجني من السجن و جاء بكم من البدو من بعد أن نزغ الشيطان بيني و بين إخوتي"

ايه الأدب ده كله ..☺ أدب مع ربنا إذ ذكر الفرج و لم يذكر الضيق و أدب مع إخوته الغادرين إذ نسب عملتهم السوده لطرف تالت

٤- لما يجيلك حد معتذر أقبل معذرته و لا تطل العتبي:

اخوة يوسف قالوا له "و إن كنا لخاطئين" رد فورا " لا تثريب عليكم "

و قالوا لأبيهم "استغفر لنا ذنوبنا إنا كنا خاطئين " رد فورا "سوف استغفر لكم ربي"

بلاش لوكلوك و اقبل الاعتذار فورا

٥- البلاء له حكمة فأصبر:

ربنا قال" كذلك لنصرف عنه السوء و الفحشاء " و بعدها بكام آيه " و دخل معه السجن فتيان"

ما هو ربنا كان قادر يصرف السوء و الفحشاء و السجن

لكنه ربنا أراد له السجن عشان محوش له الأجمل

٦- الثقة في الله:

يعقوب فقد ابنه من عشرات السنين و مع ذلك لم يفقد الأمل و قال لولاده بعد فقد الابن التاني

"يا بني اذهبوا فتحسسوا من يوسف و أخيه و لا تيأسوا من روح الله إنه لا ييأس من روح الله إلا القوم الكافرون"

و بالمناسبة دي أكتر آيه بتمس قلبي في هذة السورة 😥

لا تفقد الثقه أبدا في ربك

يوسف رجع لأباه

بنيامين رجع ليوسف ثم لأباه

بصر يعقوب رجع

فقط ثق بالله 🙏🙏

٧- لما يجيلك خبر مزعج

افزع إلي الله و سيبك من البشر

قالوله يوسف أكله الذئب .. قال فصبر جميل

قالوله إن إبنك سرق .. قال فصبر جميل عسي الله أن يأتيني بهم جميعا

ممسكش في خناقهم و لا سبهم و لا لعنهم

فقط "تولي عنهم" و شكي " بثه و حزنه إلي الله " و التزم الصبر و مش أي صبر .. الصبر الجميل .. يعني لسانك صابر عن قول ما يغضب الله و قلبك راضي من جوه

٨- التغافل و التفويت

سيدنا يوسف اخواته بعد كل اللي عملوه فيه

لسه مصرين يسيئوا له😟

"قالوا إن يسرق فقد سرق أخ له من قبل "

عمل إيه سيدنا يوسف

سمع الكلمة و فوتها

"فأسرها يوسف في نفسه و لم يبدها لهم "

مش كل حاجه لازم ترد و تثأر و تنتقم لكرامتك .. خلاص اعرف صاحبك و علم عليه و خلاص

٩- حنية الأب عجيبة و الله 👨‍👦‍👦

العيال عملوا عمايل سودا

و ضيعوا أحب ابنائه و مع ذلك

خايف عليهم و بكل الحنيه بيناديهم طول السوره "يا بني"

و الأدهي.. خايف عليهم من الحسد أنهم يروحوا للعزيز بربطة المعلم فيتنشوا عين

فيقول لهم " لا تدخلوا من باب واحد و ادخلوا من أبواب متفرقة"

١٠- جينات الفتي متأصلة عند المصريين 😂😂

مفيش مصري بيقول معرفش 🇪🇬🇪🇬

الملك حكي للحاشية رؤيا السبع بقرات و السبع سنبلات

أول حاجه لازم يفتوا .. قالوا أضغاث أحلام

و ما نحن بتأويل الأحلام بعالمين

طب لما أنتوا متعرفوش بتفتوا ليه 😂

بس كويس علي الأقل أنهم كانوا بيفتوا نص فتيه و الباقي يقولوا منعرفش .. واضح الجينات كانت لسه علي قدها 😂

لو دلوقتي هيقولوا

أضغاث أحلام يا ريس و ابقي ادبح ٧ بقرات وطلعهم لله و بطل بخل بقي عشان ربنا يبارك لك في مالك و عيالك و متنساش تستغطي حلو بالليل😂

بلاش فتي أرجوكم